الرئيسية / Fashion / imgrad / (taskla tamuṛukʷiyt tatrart (gr idgam d wass ad

(taskla tamuṛukʷiyt tatrart (gr idgam d wass ad

tzṛa tskla tamγṛabiyt g uzgn n tasut lli izrin yan waddad n ubuɣlu g mnnawt tsggiwin n igr n tskla, tzṛa tmdyazt imikk n tifawt d tlelli ;ma ay ann ad as d yiwin ad tbuɣlu, ttyaran idlisn nns ; ttuyɣran ; ttuynnan g tuggt n tmldiwin, fkn t i imaratn tismγuṛin ; alln t id bab nnsn g tugt n ilmuqqaṛn d igrawn ; sskcmnt tn g waggʷur n umzruy.

tama nns issurf umzgun anamur awd nttan ca n tsurifin, issummn xf iggi n udkkʷan ; yissan abrid isslkamn imun dids.

tama nnsn ismd usnflul tamattuyt n tskʷfal nns,yara tullist ; yals tt i imẓyanen ; yamẓ aγanib s uskkil n ungal, llig ttuynnan t kigan n tɣawsiwin iẓlin s wamun nnɣ.

ur tbidd twada n tskla tanamurt g waddad ad ;tdda sul d usaka  tmun dids s kigan n  tutlayin lli tt sẓlinin ; yuws g tyafut ann ujdiig n tlelli lli yutn s iẓuran ;ifsi ifrawn nns g ignwan ; tmmatti sg tskla tawinant ar tin tirra ; talli mi ẓdan iskkiln ifalan g wammas n tmdyazin ; tullisin ; ungaln ula imzgunen…macc annaz lli ittuyfkan i tskla tamzwarut d udɣar nns asrtan, ur ittuyfka i tmggarut ;  ur as ttuynmalan  ilmuqqaṛn ur tt smɣṛn g tfugliwin, ma ay ann ad as yuwsn ad bdda tɣama tg tasimant.

akʷud llig ssnn id bab nns s watig n wanaw ad n tskla ; frkn s uḍγar nns g wammas n tussna ; y-igat fllas wawal, yili  uswingm g igr n  tirra ; asin iɣunab nnsn, sbuγlun awal d tskla nnsn ; ssattuyn tiskʷfal nns, snurzn ad d tmgiddi d tskliw timaḍlanin ; bikksn sul tizi ad, ssutrn ad as d yaɣul waddur lli tt inn tkka tddr g umaglan nns.

ssntin imazzaln smunen ca g tskla tawinant ; ilin wid ẓmanin isyafatn n iman d wulawn nssn, fkn aɣ gis tuska tasnflult s iwiz d uẓṭṭa n iskkiln ; ilin wiyyaḍ ar ttalsn tullisin s tmkʷttit ,snubbcn g umzruy, aggʷin nn tuggt n tγmrin n tγrma nnsn ; afin abrid lli rad d munn, abrid lli igan win tskla nnsn, walli igan afssay lli iẓḍaṛn ad yaws g umgiddi nns tama n tskla yaḍnin.

tigira ad llig tllil tutlayt g tgʷuriwin timzday; tili  tutlayt izdaggn, tad ikcm i usslmd, yattuy bahra uswir n tskla tamuṛukʷiyt, nttnin d imzwura lli yuran askkil s tγarast tamaynut ; gin nn sul tuggʷas ad fkn, fkn daɣ ; afad ad aznen isnfluln nnsn s bṛṛa n tmazirt ; iwiz lli akkʷ awuzn, frkn is rad t tγrm tskla s ills nns, bbin aqqayn d tyafut n tɣrma, nttat ad rad ig inigi xf tudrt n imaratn mqqaṛ tn iwin ussan nssn kcmn ddaw tirac n wakal, ig uskkil iman nnsn, taskla taɣssa nnsn ; gin isutar lli xf tsdu tγrma, talli iran ad tszga abddad nns ; tazn asmmaqql, tddr tulaft nns, tamṛ adɣar gr tskla tamaḍlant.

Amaziɣ ɛali ububker : (amɣnas n tsmiddgt n tnzruft).

شاهد أيضاً

tasrtit n uɣucaf d ugruṭṭu

   tɣama d sul tmurt nnɣ am gis ddrn imudar, ur yad nssin is d …

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

%d مدونون معجبون بهذه:
Visit Us On FacebookVisit Us On Youtube